Fusiuns da vischnancas han conjunctura auta, betg mo en il Grischun. Dapi l’onn 2000 n’èn betg main che 750 vischnancas svanidas en Svizra. En il Grischun dumbrain nus il 1. da schaner 2018 anc 108 vischnancas. Jau hai emprendì en scola primara avant 35 onns che noss chantun cumpiglia 213 vischnancas politicas.
Text: Prof. Dr. iur. Ursin Fetz, Foto: Shutterstock
Igl è uras da sa dumandar, sche quest process ha gì success. La scola universitara professiunala HTW da Cuira ha inventà in “check da fusiuns” che sa cumpona da 47 indicaturs per dar resposta. Las datas derivan da las vischnancas, da statisticas uffizialas e da l’opiniun da la populaziun. Per quest intent avain nus - sin incumbensa dal chantun - tramess passa 50'000 questiunaris il settember passà en l’entir chantun Grischun.
Tantas persunas èn pertutgadas en noss chantun da fusiuns! Da quels èn vegnids returnads passa 15%. Quai è in fitg bun dumber. Dapli infurmaziuns ed era in test dal “check da fusiuns” chattais Vus sin htwchur.ch/fusions-check.
Actualmain essan nus vidlonder d’evaluar ils resultats dal “check da fusiuns” grischun. En il fratemp avain nus intercurrì in tozzel vischnancas fusiunadas en ils chantuns da Berna, Glaruna e Turitg. Da quels projects savainsa ch’i dat avantatgs (qualitad da las prestaziuns communalas, pli paucas corporaziuns intercommunalas etc.) e dischavantatgs (p.ex. participaziun sbassanta). Intgins effects n’èn betg mo influenzads da la fusiun, mabain er da la midada da nossa societad. Il pli impurtant per il success è dentant che la suprastanza nova regia cun fin sentiment e garantescha cuntinuitad.
vischnanca =(politische) Gemeinde
vitg = Dorf
success = Erfolg
svanir = verschwinden
inventar = entwickeln
opiniun = Meinung
intercurrir = untersuchen
tozzel = Dutzend
avantatg = Vorteil
cun fin sentiment = mit Fingerspitzengefühl
Als Leiter des Zentrums für Verwaltungsmanagement (ZVM) ist Ursin Fetz verantwortlich für Weiterbildung, Beratung sowie Forschung mit öffentlichen Verwaltungen und Non-Profit-Organisationen an der HTW Chur. Er hat seinen Forschungsschwerpunkt auf Gemeindestrukturen gelegt und diverse Fusions-Projekte geleitet und weitere Gemeindeberatungen durchgeführt.
Dies ist ein Blog-Beitrag der HTW Chur.